तीन दल समझदारी, स्थानीय तहकै निर्वाचन
काठमाडौं, पुस १४ –
प्रमुख तीन राजनीतिक दलबीच स्थानीय तहकै निर्वाचन गर्ने सैद्धान्तिक समझदारी भएको छ । सिंहदरबारस्थित प्रधानमन्त्री कार्यालयमा बुधबार भएको तीन दलको बैठकमा कांग्रेस, एमाले र माओवादी केन्द्र बैशाख पहिलो साताभित्र स्थानीय तहको निर्वाचन गर्ने टुंगोमा पुगेका हुन् ।
आजको कान्तिपुरमा खबर छ– मधेसी मोर्चा र संसद्मा प्रतिनिधित्व गर्ने अन्य दलहरुसँग एकसरो छलफल गरेपछि निर्वाचन मिति घोषणा गरिने समझदारी बनेको कांग्रेसका बरिष्ठ नेता रामचन्द्र पौडेलले बताए ।
यसअघि कांग्रेसले पुरानै संरचनाको स्थानीय निकाय निर्वाचनको माग राख्दै आएको थियो । स्थानीय निकाय पुनःसंरचनाको काम सकेर प्रतिवेदन बुझाउने तयारी गरेको सन्दर्भमा माओवादी र एमालेसमेतले नयाँ संरचनाकै निर्वाचनमा जान दबाब दिएपछि कांग्रेस लचक भएको हो । ‘स्थानीय तहकै निर्वाचन हुने भनिएको छ, मोर्चासँग छलफल गरेर निर्णयमा पुगिन्छ, पौडेलले भने, ‘अरु दलहरुसँग पनि सल्लाह गरेर निर्वाचन मिति घोषणा हुन्छ ।’
