थूलुङ दुदकोशिमा खुल्ला पुरुष फुटबल प्रतियोगिता सुरु

सोलुखुम्बु । खेल खेलौ स्वस्थ रहौ, आफ्नो गाउँ युवा मिलि आफै बनाऔं, भन्ने मुल नाराका साथ दुधकोशी युवा क्लबको आयोजनामा संचालित खुल्ला पुरुष फुटबल प्रतियोगिता एवम सास्कृतिक कार्यक्रमको उद्घाटन सम्पन्न भएको छ ।

थूलुङ दुदकोशी गाउँपालिका वडा नं ४ जुबुस्थित जनकल्याण माध्यमिक विद्यालयको प्रांगनमा आयोजित ५ दिने फुटबल प्रतियोगिता कार्यक्रमको उद्घाटन समारोहलाई सम्बोधन गर्दै थुलुङ दुधकोशी गाउँपालिका अध्यक्ष अशिम राईले हरेक क्षेत्रको विकासमा प्रतिवद्ध रहेको बताएका छन् । अध्यक्ष थुलुङले दिगो विकासका लागि जग हाल्ने काम गरिरहेको बताए ।

स्वास्थ्य, शिक्षा लगायतका क्षेत्रलाई विशेष प्राथमिकता दिई अगाडी बढाउँदै उनले दुधकाशी सामुदायिक अस्पतालको ९० प्रतिशत काम सम्पन्न भएको र बुह प्राविधिक शिक्षालय स्थापना गरेको बताए । खेलकुदको माध्यमबाट गाउँपालिकालाई समृद्ध बनाउने उनको भनाई छ । सोही कार्यक्रममा बोल्दै सभाषद गोपाल गिरीले खेलकुदको विकासबाट मुलुकलाई विश्वसामु चिनाउन सकिने बताए । उनले खेलाडीहरुको खेल क्षमतालाई कसैले पनि कुण्ठित बनाउन नसक्ने समेत बताए ।

उक्त प्रतियोगितामा १६ टिमको सहभागिता रहेको छ । खेलमा प्रथम, द्धितिय, तृतिय र सान्त्वना हुने टिमलाई क्रमश १ लाख १ हजार १ सय ११, ७५ हजार १ सय ११, ३५ हजार १ सय ११ र १० हजारको साथमा सिल्ड, मेडल र प्रमाणपत्र प्रदान गरिनेछ ।

कार्यक्रममा गाउँपालिकाकी उपाध्यक्ष सविता राई, विभिन्न वडाका वडाअध्यक्षहरु, समाजसेवी बलराम गुरुङ बुद्दिजिवी र खेलप्रेमिको बाक्लो उपस्थिती रहेको थियो ।