हवाईजहाजबाट घर जानलाई नाम टिपाउन खुम्बु पासाङ ल्हामु गाउँपालिकाको आह्वान
सोलुखुम्बु – खुम्बु पासङ ल्हमु गाउँपालिकाले काठमाडौं रोकिएका सोलुखुम्बुको खुम्बु क्षेत्रका नागरिकहरुलाई हवाई जहाज मार्फत उद्धार गरी गाउँ फर्काउने अभियान अघि सारेको छ । लक डाउनका कारण राजधानीमा रोकिएका खुम्बुबासीहरुलाई खुम्बु पासाङ ल्हामु गाउँपालिकाले उद्धार गरी गाउँ फर्काउने भएको हो ।
गाउँपालिकाले सूचना जारी गर्दै सडक मार्गबाट गाउँ फर्कन नपाएका व्यक्तिलाई हवाईजहाजबाट ल्याउँन लागिएको जनाएको छ । गाउँपालिका प्रबक्ता ल्हाक्पा छिरि शेर्पाका अनुसार काठमाडौंबाट र्फकंदा लाग्ने हवाई जहाज भाडा भने यात्रु आफैले तिर्नुपर्ने छ ।
काठमाडौंबाट गाउँ फर्काईएका व्यक्तिहरुलाई अनिबार्य १४ दिन होम क्वारेन्टिनमा राखिने जानाइएको छ । काठमाडौंमा रहेका खुम्बु क्षेत्रमा कार्यरत शिक्षक र कर्मचारीलाई पनि हवाईजहाजबाटै गाउँ फर्काइने गाउँपालिकाका प्रबक्ता शेर्पाको भनाई छ । फर्किन चाहने ब्यक्तिले सम्बन्धित वडाका अध्यक्षलाई नाम टिपाउन गाउँपालिकाले आग्रह गरेको छ ।
