असोज १७, काठमाडौं । नेपाली चलचित्र “कबड्डी कबड्डी कबड्डी” ले नेपाली चलचित्रमा ऐतिहासिक रेकर्ड बनाएको छ ।

हलमा चल्न थालेको दुई हप्ताको अन्तरालमा चलचित्रले ११ करोड तीन लाखको ग्रस ब्यापार गरेको हो । चलचित्रको निर्माण पक्षले सार्वजनिक गरेको रिपोर्ट अनुसार पहिलो हप्ता सात करोडभन्दा बढीको व्यापार गरेको थियो ।

दयाहाङ राई, उपासना सिंह ठकुरी, कर्मा, विल्सन विक्रम राई र बुद्धि तामाङको मुख्य भूमिका रहेको “कबड्डी कबड्डी कबड्डी” ले उपत्यकाभित्र ६ करोडको ब्यापार गरेको अनलाइन खबर मा उल्लेख छ । काठमाडौंबाहिर भने पाँच करोडको मात्रै व्यापार भएको छ । हालसम्मको स्थिति हेर्दा “कोहिनूर” चलचित्रले बनाएको १० करोडको रेकर्ड तोड्न “कबड्डी कबड्डी कबड्डी” सफल भएको छ ।