- TRENDING
- ENGLISH
हालको खबर
प्रेम दिवस विशेषः सविना अधिकारीका आधा दर्जन मुक्तकहरु
मुक्तक–१
चित्र हेरेका हौ या चरित्र ? मरिहत्ते गर्छौ
न परिचित हौ न त मित्र, मरिहत्ते गर्छौ
यसरी प्रस्ताव बारम्बार इन्कार गर्दापनि
खास के देख्यौ र म भित्र ? मरिहत्ते गर्छौ ।।
मुक्तक–२
उनिउहरु फुल्ने उपाय छ भने
त्यसमा भवरा डुल्ने उपाय छ भने
यति कुरा मलाइ नि बताउ है साथी
निस्ठुरीलाई भुल्ने उपाय छ भने ।।
मुक्तक–३
गरिदेकी छु सुराकी तिम्रै मर्जी भो
के–के गर्छौ अब बाँकी तिम्रै मर्जी भो
चिठी पनि ठेगना पनि दिएको छ उस्ले
प्रापक बन्ने या हुलाकि तिम्रै मर्जी भो ।।
मुक्तक–४
हाँस्ने बोल्ने थियो चलन बन्द भएछ
जिन्दगीको रौनक झन्झन् बन्द भएछ
प्रेमको मसीले पाना–पाना भर्ने मन थियो
उफ् ! तिम्रो दिलमा आवेदन बन्द भएछ ।।
मुक्तक–५
चिठी अनि खाम हेरी चित्त बुझाउँछु
दिलभित्र छ नाम हेरी चित्त बुझाउँछु
नफर्कने गरी उ गएपछी जिन्दगीबाट
अस्ताएको घाम हेरी चित्त बुझाउँछु ।।
मुक्तक–६
भन्यौ चलेको चलन छ सोच्नुपर्थ्यो तिम्ले
आफैबाट नियम बन्छ सोच्नुपर्थ्यो तिम्ले
घन राखेर वचनमा प्रहार गर्नु अगाडि
मेरो जस्तै उसको मन छ सोच्नु पर्थ्यो तिम्ले ।।
