नारायणगढमा एक दिने सहकारी प्रशिक्षण

चितवन, फागुन २–

नारायणगढमा सोमबार एकदिने सहकारी प्रशिक्षण दिइएको छ । नारायणगढको शहीदचोकमा रहेको महाबौद्ध बचत तथा ऋण सहकारी संस्था लिमिटेडले संस्थाका सञ्चालक समिति, लेखा समिति, अन्य उप–समितिहरुका साथै सेयर सदस्यहरुलाई प्रशिक्षण दिइएको हो । उनीहरुलाई सहकारी प्रशिक्षण तथा डिभिजन कार्यालय भरतपुरका पाचार्य रेवतीरमण पोखरेल, सहकारी निरीक्षकद्वय रामबाबु पौडेल र ऋषिराम भुसालले प्रशिक्षण दिएका थिए । सहकारी भनेको के हो ? संस्थाको बैठक कसरी सञ्चालन गर्ने, निर्णयहरु कसरी पारित गर्नेलगायतका विषयमा प्रशिक्षण दिइएको सहकारी संस्थाका अध्यक्ष ईश्वरीप्रसाद घिमिरेले जानकारी दिए ।
सहकारी संस्थाहरु धेरै खुलेकाले यसबारे आवश्यक परामर्श दिनुपर्ने भएकोले एकदिने प्रशिक्षण कार्यक्रमको आयोजना गरिएको अध्यक्ष घिमिरेले बताए । कार्यक्रममा एकसय जनाभन्दा बढीको सहभागीता रहेको थियो । २०७० सालमा स्थापना भएको सहकारी संस्थामा हाल सदस्य संख्या ८५० नाघेको संस्थाका प्रबन्धक प्रकाश पाण्डेले जानकारी दिए । कतिपय संघसंस्थाहरुलाई संस्थाको नीति नियमबारे सामान्य ज्ञान समेत नहुँदा संस्था धरासायी बन्ने गरेका घटनाहरु आइरहेकोले समयसमयमा यस्ता प्रशिक्षणको आवश्यकता रहेको सहकारी प्रशिक्षण तथा डिभिजन कार्यालय भरतपुरका प्राचार्य पोखरेलले बताए ।