पुनर्निर्माणमा नसघाउने मन्त्रालयलाई कारबाही गर्न एमालेको माग

काठमाण्डौं, फागुन २-

प्रमुख प्रतिपक्षी दल नेकपा एमालेले पुनर्निर्माणको काममा सहयोग नगर्ने मन्त्रालय र सम्बन्धित निकायलाई तत्काल कार्वाही गर्न सरकारसँग माग गरेको छ ।

राष्ट्रिय पुनर्निर्माण प्राधिकरण निर्देशक समितिको सोमबार बसेको बैठकमा प्रमुख कार्यकारी अधिकृत प्राध्यापक डा. गोविन्द्र पोखरेलले मन्त्रालय मातहतमा सम्पन्न गर्नुपर्ने पुनर्निर्माणको काम अघि बढन नसकेको बताए ।लगतै एमालेका उपाध्यक्ष भीम रावलले समितिको यस अघि बसेको बैठकले दिएको निर्देशन अनुसार काम नगर्ने मन्त्रालय र सम्बन्धित निकायलाई कार्वाही गर्न माग गरे। प्राधिकरणका तत्कालीन प्रमुख कार्यकारी अधिकृत सशील ज्ञवालीमाथि कारबाही गर्ने सरकारले काम नगरेका मन्त्रालयलाई भने किन कारबाही नगरेको भन्दै आक्रोश पोखे ।

२ महिना अघि बसेको निर्देशक समितिको बैठकले सहरी विकास, शिक्षा, पर्यटन, स्थानीय विकास, भौतिक पूर्वाधार तथा यातायात मन्त्रालयलाई आफू मातहतको पुनर्निर्माणको कामलाई अघि दिन निर्देशन दिएको थियो ।बैठकमा प्रधानमन्त्री एवम् समितिका अध्यक्ष पुष्पकमल दाहालले पुनर्निर्माणको कामलाई तीव्र गतिमा अघि बढाउन सरकार प्रतिवद्ध रहेको बताएका छन् ।