ट्रेड युनियन महासंघको संयोजकमा कँडेल

चितवन, माघ २९–

नेकपा माओवादी केन्द्र निकटको मजदुर संगठन अखिल नेपाल ट्रेड युनियन महासंघ चितवनको जिल्ला एकता भेला शनिबार भरतपुरमा सम्पन्न भएको छ ।

भेलाले यदुमणि कँडेलको संयोजकत्वमा ६५ सदस्यीय नयाँ जिल्ला कार्यसमिति गठन गरेको छ । संयोजकमा चुनिएका कँडेलले मजदुर मुक्तिका लागि वर्गीय एकता आजको आवश्यकता भएको बताए । उनले जिल्लामा मजदुरका समस्या हल गर्न नयाँ कार्यसमितिले प्राथमिकतासाथ काम गर्ने बताए ।

भेलाका प्रमुख अतिथि नेकपा माओवादी केन्द्रका पोलिटब्युरो सदस्य एवंम चितवन जिल्ला इन्चार्ज इश्वरी भट्टराई रहेका थिए । भेलालाई सम्बोधन गर्दै भट्टराईले अहिलेको युगमा पनि शोषित र पीडित मजदुर वर्गको उत्थानका लागि नयाँ कार्यसमितिले प्रभावकारी काम गर्ने विश्वास व्यक्त गरे । उनले एक्काइसौँ शताब्दीका मजदुरलाई शक्तिशाली बनाउने काममा ट्रेड युनियन महासंघ लाग्नुपर्ने बताए ।

भेलामा बोल्दै माओवादी केन्द्र जिल्ला सहइन्चार्ज आकांक्षा, अखिल नेपाल ट्रेड युनियन महासंघ जिल्ला सहइन्चार्ज दीपचन्द्र पुडासैनी लगायतले मजदुरबीचको एकताले समाजवादी क्रान्ति सम्पन्न हुने विचार व्यक्त गरेका थिए ।