सार्वजनिक लेखा समितिको बैठक बस्दै, वित्तीय व्यवस्थापन र तरलताबारे छलफल हुने
काठमाडौं,माघ २४-
व्यवस्थापिका संसदअन्तर्गत सार्वजनिक लेखा समितिको बैठक सोमबार बस्दैछ। बिहान ११ बजे बस्ने बैठकमा मुलुकको वित्तीय व्वस्थापन, माैद्रिक तरलता र राजश्व परिचालनबारे छलफल हुने समितिका सभापति डोरप्रसाद उपाध्यायले जानकारी दिए।
उनका अनुसार नेपाल राष्ट्र बैंकका गभर्नर चिरञ्जिवी नेपाल र अर्थ मन्त्रालयका सचिव शान्तराज सुवेदीलाई पनि छलफलका लागि बैठकमा बोलाइएको छ। पूँजीगत बजेट खर्च हुन नसकेको, सरकारको ढुकुटीमा पैसा थुप्रिएको र बैंकहरुले तरलता अभाव भोगिरहेकाले यिनै विषयमा छलफल गर्न लागिएको सभापति उपाध्यायले बताए। उपाध्याय सभापतिमा निर्वाचित भएपछि पहिलो पटक समितिको बैठक बस्न लागेको हो। उनले नेकपा एमालेका सांसद पशुपति चौलागाइँलाई ७ मतले पराजित गरेका थिए।
माओवादी सांसद जनादर्न शर्मा मन्त्री भएपछि सभापति पद रिक्त हुँदा ६ महिनाभन्दा लामो समयदेखि समितिको बैठक बस्न सेकेको थिएन।
