काठमाडौं, माघ २२–

वैदेशिक रोजगारीका लागि मलेसिया जाने नेपाली कामदारबाट स्वास्थ्य परिक्षणका नाममा लिइरहेको अवैध शुल्क रोक्न गृह मन्त्रालयले आनाकानी गरेको छ । पराराष्ट्र, श्रम तथा रोजगार र गृह मन्त्रालयका अधिकारीको छलफलपछि अवैध रकम उठाउनेलाई कारबाही गर्ने निर्णय भएको थियो ।

निर्णय लगतै गृह मन्त्रालयलाई छानविन गरि कारबाही गर्न परराष्ट्र मन्त्रालयले पत्राचार गरेपनि गृहले प्रक्रिया अघि बढाएको छैन । परराष्ट्रको पत्र समेत गृह मन्त्रालयबाटै गायव भएको छ ।
गृह श्रोतका अनुसार कानून माहाशाखा, कानून शाखा र अन्य कुन शाखाबाट कारबाही अघि बढिरहेको भन्ने पत्तो लाग्न सकेको छैन । सम्बन्धित शाखाका अधिकारी एक अर्कालाई देखाएर उम्किन खोजिरहेका छन् ।

गएको पुसमा मलेसिया सरकारले माइग्राम्सका नाममा आफूले रकम नलिएको बताएपछि परराष्ट्र मन्त्रालयले त्यस अघि कामदारले बुझाएको रकम समेत फिर्ता गराउन गृहलाई भनेको थियो । तर एक महिना बितिसक्दा पनि गृहले कुनै कारबाही गरेको छैन । गएको मे १ देखि मलेसिया जाने कामदारले माइग्राम्स वापत ३० डलर अथवा झण्डै ३२ सय रुपैयाँ बुझाउँदै आएका छन् ।
स्वास्थ्य व्यवसायीले भने माइग्राम्सका नाममा उठाएको रकम वैध भएको जिकिर गर्दै रकम जम्मा नगर्दासम्म स्वास्थ्य परिक्षण रोकेका थिए । पछि म्यानपावर व्यवसायीले रकम जम्मा गरेरैवैदेशिक रोजगारमा पठाउन थालेका छन् ।

यतिका समय बित्दापनि कारबाही नभएपछि मलेसियामा नेपाली कामदार पठाउने व्यवसायीले चैत १ गते सम्म कारबाही नभए मलेसिया कामदार पठाउन बन्द गर्ने चेतावनी दिएका छन् ।