नवलपरासी, माघ १३–

तमू ह्युल छोंज धिं गुरुङ राष्ट्रिय परिषद्को तेस्रो महाधिवेशन आगामी माघ २२ गतेदेखि नवलपरासीमा हुने भएको छ ।

‘सम्पूर्ण तमूहरुको साझा अभियान, तमुवानसहितको सङ्घीय संविधान कार्यान्वयनका लागि तेस्रो राष्ट्रिय महाधिवेशन’ भन्ने मूलनाराका साथ महाधिवेशन गर्न लागिएको परिषद्द्वारा आज काठमाडौंमा आयोजित पत्रकार सम्मेलनमा सो जानकारी गराइएको हो ।

तिन दिने सो महाधिवेशनमा मुलुकभरका ६२ वटा जिल्ला र विदेशस्थित २५ संस्थाका प्रतिनिधि र पर्यवेक्षकसहित करिब एक हजारको सहभागिता रहने परिषद्का अध्यक्ष रेशम गुरुङले जानकारी दिनुभयो ।

लोकतान्त्रिक गणतन्त्र नेपालमा जातीय पहिचानसहितको सङ्घीय संविधान जारी गराउनका लागि आदिवासी जनजातिको आन्दोलनको परिणामलाई मूर्तरुप दिन महाधिवेशनले मद्दत गर्ने विश्वास परिषद्को छ ।