मृगौलापीडित बानियाँका लागि आर्थिक सहयोग जुट्दै

चित्रबहादुर गुरुङ्ग,
चितवन, माघ ११–

चितवनको चण्डिभञ्ज्याङ्ग–९, पैरेनीका मृगौला पीडित युवा रुद्रबहादुर बानियाँको मृगौलाको डायलासिस तथा प्रत्यारोपण उपचारको लागि सहयोगी मनहरुबाट सहयोग आउने क्रम जारी रहेको छ ।
मनकामना एफ.एम ९८.७ मेघाहर्जको संयोजनमा रुद्रको उपचारका लागि थालिएको सहयोग जुटाउने अभियानमा पछिल्लो क्रममा श्री चनौटे महिला समाजसेवी आमा समूह चण्डिभञ्ज्याङ्ग–९, चनौटेले १६ हजार ४ सय ७० रुपैयाँ र सोहि गाउँका संगीता क्षेत्रीले व्यक्तिगत रुपमा १ हजार ५ रुपैयाँ सहयोग गरेका छन् । उनीहरुले पीडितकी आमा रुद्रकुमारी बानियाँको नाममा एपेक्स डेभलपमेन्ट बैंक आँबुखैरेनी शाखामा खोलेको खाता नं. ००७१०७०००६३७२४०००००१ मा सहयोग रकम जम्मा गरिदिएका हुन् । यो सँगै पीडितको उपचारका लागि अहिलेसम्म करिब १ लाख २ हजार २५ रुपैयाँ जम्मा भैसकेको पीडितका आमा रुद्रकुमारीले बताईन् ।

यसअघि प्रवासी युवा मञ्च चण्डिभञ्ज्याङ्ग दोहा कतारको समूहले करिब ५२ हजार, कतारमा कार्यरत विष्णु बानियाँको सहयोगमा करिब २१ हजार र साउदीबाट ईश्वर बानियाँ र नेत्र गुरुङ्गले १० हजार ८ सयका साथै चण्डिभञ्ज्याङ्ग–६, कालिखोला निवासी भूपेन्द्र चेपाङ्ग १ हजार २५ रुपैयाँ सहयोग गरेका थिए । हाल रुद्रको पूर्वी चितवनको टाँडीमा डायलसिस उपचार भैरहेको परिवारले जनाएको छ ।