चितवन, माघ ८–
मुदिर उपन्यासका लागि उपन्यासकार मीनराज बसन्त र लेखक पूर्णबहादुर अधिकारी सम्मानित भएका छन् ।
साहित्य संगम, चितवन र प्रगतिशील लेखक संघ चितवनको संयुक्त आयोजनामा भरतपुरमा भएको कार्यक्रममा मुदिर उपन्यासका लागि गणेश तथा हस्तकुमारी (लक्ष्मीदेवी) पन्त स्मृति पुरस्कार २०७३ बाट लेखक बसन्तलाई पुरस्कृत तथा सम्मानित गरेको हो । त्यसैगरी श्रीप्रसाद तथा रेणुका रेग्मी स्मृति पुरस्कार २०७३ बाट लेखक, निबन्धकार पूर्णबहादुर अधिकारीलाई सम्मानित गरिएको हो ।
साहित्य सङ्गम, चितवनका अध्यक्ष द्वारिका नेपालको अध्यक्षतामा भएको पुरस्कार वितरण तथा सम्मान कार्यक्रममा अरबी भूमिमा काम गर्ने नेपालीहरूको पीडालाई समेटेर लेखिएको मुदिर उपन्यासले उक्त पुरस्कार प्राप्त गर्न सफल बनेको हो । यो पुरस्कारको राशी पाँच हजार रुपैयाँ रहेको छ । विगत २०६५ सालदेखि यो पुरस्कार प्रदान गर्न थालिएको हो । यसअघि गणेश तथा हस्तकुमारी (लक्ष्मीदेवी) पन्त स्मृति पुरस्कारबाट निमेष निखिल, निभा शाह, सरिता तिवारी, धनराज गिरी, शकुन्तला जोशी, किसानप्रेमी, जनकराज सापकोटा, सुमनराज श्रेष्ठ पुरस्कृत भइसक्नुभएको छ ।
त्यसैगरी सोही कार्यक्रममा पूर्णबहादुर अधिकारीलाई कविता, निबन्ध, संस्मरण लेखनबाट नेपाली साहित्यमा पु¥याउनुभएको उत्कृष्ट योगदानको कदर गर्दै श्रीप्रसाद तथा रेणुका रेग्मी स्मृति पुरस्कार २०७३ बाट पुरस्कृत तथा सम्मानित गरिएको हो । यो पुरस्कारको राशी सात हजार रुपैयाँ रहेको छ ।
कार्यक्रममा पुरस्कार संस्थापक रविकिरण निर्जीव, साहित्यकार इन्द्र रेग्मी, साहित्यकार लकाश पौडेल, गरिमा साहित्यिक पत्रिकाका सम्पादक हरिहर खनाल, समीक्षक उदय अधिकारी, साहित्यकार राजेन्द्र घायल, सुमन मुस्कान, प्रदीप पौडेललगायतले बोल्नुभएको थियो ।