निजगढ विमानस्थलको ट्र्याक खोल्ने जिम्मा नेपाली सेनालाई

काठमाडौँ,माघ ६ –

दोस्रो अन्तर्राष्ट्रिय विमानस्थलका रुपमा निर्माण गर्न लागिएको निजगढ एयरपोर्टको ट्र्याक खोल्ने जिम्मा नेपाली सेनाले पाएको छ ।

नागरिक उड्ययन प्राधिकरणको बोर्ड बैठकले विमानस्थलसम्म पुग्ने बाटो, विमानस्थल वरिपरि निर्माण गरिने परिधीमार्ग, ट्याक्सी वे निर्माणको ट्र्याक खोल्ने काम नेपाली सेनालाई जिम्मा दिने निर्णय गरेको हो । एयरपोर्ट निर्माणका लागि आवश्यक पर्ने वनको जमिन खाली गर्न कटान गर्नुपर्ने काठको सुरक्षाको जिम्मेवारी पनि सेनाले नै पाएको छ ।

जग्गा अधिग्रहण, डीपीआर तयार पार्ने र निर्माणका लागि भने ग्लोबल टेण्डर गर्ने तयारी भइरहेको पर्यटनमन्त्री जीवनबहादुर शाहीले जानकारी दिएका छन् । तर, त्यसअघि विमानस्थल कुन मोडलबाट बनाउने राजनीतिक निर्णय गर्नुपर्ने उनले बताए ।

त्रिभुवन अन्तर्राष्ट्रिय विमानस्थलको विकल्पका रुपमा निजगढमा एयरपोर्ट बनाउने योजना अघि सारिएको थियो । यसलाई राष्ट्रिय गौरवको आयोजनामा राखिएको छ । तर, चर्चा धेरै भएपनि विमानस्थलको डीपीआर समेत बन्न सकेको छैन ।

कोरियन कन्सल्ट्यान्ट कम्पनी ल्याण्डमार्क वर्ल्डबाइड ९एलएमडब्लू०ले २०१० मा नै अध्ययन प्रतिवेदन तयार पारेको थियो । सरकारले अब उचित रकम दिएर एलएमडब्लूसँगको सम्झौता तोड्ने तयारी अघि बढाएको छ ।