काँग्रेसका नेता न्यौपानेको निधन

काठमाडौँ,माघ २ –

नेपालको लोकतान्त्रिक आन्दोलनका अथक योद्धा हरिप्रसाद न्यौपानेको ८७ वर्षको उमेरमा आज राजधानीमा निधन भयो ।

प्रजातान्त्रिक आन्दोलनमा २००७ सालदेखि सक्रिय नेता न्यौपानेले तनहुँ जिल्लाबाट लोकतान्त्रिक आन्दोलनको नेतृत्व गर्नुभएको थियो ।

तनहुँको ब्यास नगरपालिकाका स्थायी बासिन्दा न्यौपानेको निधनप्रति नेपाली काँग्रेसले गहिरो दुःख व्यक्त गर्दै शोकाकुल परिवारजनमा हार्दिक समवेदना प्रकट गरेको छ ।

पार्टी सभापति शेरबहादुर देउवाले आज एक शोक वक्तव्य जारी गरी नेता न्यौपानेको निधनबाट नेकालाई अपूरणीय क्षति भएको बताउनुभएको छ ।

स्वर्गीय न्यौपानेको आजै पशुपति आर्यघाटमा दाहसंस्कार गरियो । काँग्रेसका नेता रामचन्द्र पौडेललगायत सांसद, विभिन्न पार्टीका नेता तथा कार्यकर्ताले आर्यघाट पुगेर उहाँप्रति अन्तिम श्रद्धाञ्जलि अर्पण गर्नुभएको थियो । – रासस