सकुम्बासी समस्या समाधान गर्न माग

चितवन, पुस १२–

चितवन क्षेत्र नम्बर ४ का सकुम्बासी बासीन्दाहरुले सुकुम्बासी समस्यालाई जति सक्दो छिटो समाधान गर्न माग गरेका छन् । लालपुर्जा नभएका कारण विवाह दर्ता, जन्मदर्तालगायतका सरकारी सेवा सुबिधाबाट बञ्चित हुनुपरेको भन्दै उनीहरुले समस्या समाधानको माग गरेका हुन् ।
सुकुम्बासी समस्या समाधान पहल समिती क्षेत्र नं.४ ले आज आयोजना गरेको बैठकमा उपस्थित क्षेत्र नं४ का सुकुम्बासीहरुले यस्तो माग गरेका हुन् । सुकुम्बासी भएकै कारण आफुहरुलाई सम्पूर्ण क्षेत्रमा समस्या भएको उनिहरुले गुनासो गरेका छन् । कार्यक्रमका प्रमुख अतिथी साँसद रामकृष्ण घिमिरेले सुकुम्बासी समुदायको समस्या समाधानका लागि छिट्टै पहल गर्ने प्रतिबद्धता जनाए । सुकुम्बासीहरुलाई उनिहरुले उपभोग गर्दै आएको जग्गाको नाप अनुसार नै जग्गा उपलब्ध गराउन सक्दो पहल गर्ने उनले बताए । यस्तै कार्यक्रममा बोल्दै सुकुम्बासी समाधान पहल समितीका जिल्ला संयोजक रामबहादुर नेपालीले सुकुम्बासी समस्या समाधानका लागि स्थानिय निकायसंग पहल गर्न आवश्यक रहेको बताए । २०३६ सालदेखि सो क्षेत्रमा बिना लालपुर्जा बसोबास गर्दै आएका सुकुम्बासीहरुलाई छिटो भन्दा छिटो व्यवस्थापन गर्नुपर्नेमा उनले जोड दिए । कार्यक्रममा सुकुम्बासी समाधान पहल समिती क्षेत्र नं.४का संयोजक भिमबहादुर दर्जीको अध्यक्षता रहेको कार्यक्रममा समाजसेवी गुणराज पाठक र वडा प्रतिनिधि ओमप्रसाद पोखरेल लगायतको उपस्थिती रहेको थियो ।