- TRENDING
- ENGLISH
हालको खबर
प्रहरी चौकीलाई जग्गा दान
इलाम,पुस ८ –
इलाम बाँझोका एक समाजसेवीले प्रहरी चौकीको भवन निर्माणका लागि करिब तीनलाख रूपैयाँ पर्ने एक रोपनी जग्गा दान दिनुभएको छ ।
बाँझो–५ का रत्नकुमार राईले प्रहरी चौकीको भवन निर्माणका लागि सो जग्गा दान दिनुभएको जिल्ला प्रहरी कार्यालय इलामका प्रहरी उपरीक्षक सुशीलकुमार यादवले जानकारी दिनुभयो ।
त्यस्तै, सोही स्थानमा पर्ने दुई रोपनी जग्गा स्थानीयवासीले आर्थिक सङ्कलन गरेर खरिद गरी चौकीलाई उपलब्ध गराएका छन् । स्थानीयवासीले स्थानीयस्तरमा आर्थिक सङ्कलन गरेर जग्गा खरिद गरेका हुन् ।
दुवै जग्गाको धनीपुर्जा बिहीबार रत्नकुमार राईले प्रहरी उपरीक्षक यादवलाई हस्तान्तरण गर्नुभयो । यसअघि सोही स्थानमा चौकी भएपनि आफ्नै भवन नहुँदा प्रहरीलाई आवासको समस्या रहेको जिल्ला प्रहरी कार्यालयले जनाएको छ । – रासस
