चितवन, पुस ७–

चितवनको भरतपुरमा पाँच दिनसम्म चलेको ‘दोस्रो चितवन मत्सव महोत्सव–२०७३’ को आज (विहीबार) खर्च विवरण सार्वजनिक गरिएको छ ।
भरतपुरमा पत्रकार सम्मेलनगरि महोत्सवमा भएका सबै कारोबार बारे जानकारी दिनुभयो । पत्रकार सम्मेलनमा लेखा संयोजक लोकबन्धु पौडेलले महोत्सवमा ५१ हजार ५ सय रुपैयाँ घाटा भएको जानकारी दिनुभयो । महोत्सवमा कुल १३ लाख ७९ हजार ६ सय ५० रुपैयाँ आम्दानी भएको थियो भने १४ लाख ३१ हजार एक सय ५० रुपैयाँ खर्च भएको उहाँले जानकारी दिनुभयो ।
पत्रकार सम्मेलनमा बोल्दै महोत्सव संयोजक एवंम नेपाल मत्स्य व्यवसायी संघ चितवनका अध्यक्ष रमेश पाण्डेले महोत्सव घाटामा गएपनि व्यवसायीहरुको लागि भने फाईदा भएको बताउनुभयो । उहाँले भन्नुभयो–“महोत्सव घाटामा गएपनि हामी खुशी छौं, माछाको फाईदा र उपयोगिता बारे बुझाउन पाउँदा धेरै राम्रो छ ।” उहाँले महोत्सवमा सोँचे भन्दा धेरै कम घाटा भएको बताउनुभयो ।
पत्रकार सम्मेलनमा बोल्दै नेपाल मत्स्य व्यवसायी संघका केन्द्रीय महासचिव जोगेन्द्र महतोले नाफा कमाउने भन्दा माछाको प्रवद्र्धन गर्ने उद्देश्यले महोत्सव भएकाले समग्रमा महोत्सव सफल भएको बताउनुभयो । उहाँले आगामी दिनमा घाटालाई परिपुर्ती गर्दै महोत्सव आयोजना गर्नमा सहज बनाउनुपर्नेमा जोड दिनुभयो ।
कार्यक्रममा महोत्सवका सदस्य सचिव लुलाराज तामाङले महोत्सव सफल बनाउन सहयोग गर्ने सबैमा धन्यवाद ज्ञापन गर्नुभयो । उहाँले विशेषगरि संचारमाध्यमको सहयोग अविस्मरणीय रहेको भन्दै संचार क्षेत्रलाई धन्यवाद व्यक्त गर्नुभयो ।
नेपाल मत्स्य व्यवासायी संघ चितवन र जिल्ला कृषि विकास कार्यालय भरतपुरको संयुक्त आयोजनामा पुस १ गतेदेखि ५ गतेसम्म औद्योगिक प्रदर्शनी केन्द्र मैदानमा दोस्रो चितवन मत्स्य महोत्सव भएको थियो । महोत्सवमा कुल २० लाखको कारोबार भएको थियो भने ३५ हजार दर्शकहरुले अवलोकन गरेका थिए ।