पत्रकार महासंघ बारामा तालाबन्दी

बीरगन्ज,पुस ७-
नयाँ सदस्यता वितरणको विषयमा विवाद बढेपछि नेपाल पत्रकार महासंघ बारा शाखामा अनिश्चितकालिन तालाबन्दी गरिएको छ ।प्रेस युनियन बाराले महासंघ बारा शाखाको कलैयास्थित कार्यालयमा ६ पुष देखि अनिश्चितकालीन तालाबन्दी गरेको हो ।युनियनका कार्यवाहक अध्यक्ष उपेन्द्र यादवको नेतृत्वमा गएको युनियन आवद्ध पत्रकारहरुले महासंघ बारा शाखाको कार्यालयमा तालाबन्दी गरेका थिए ।

महासंघ बारा शाखाका अध्यक्ष कमल कुमार उपाध्यायले महासंघको नयाँ सदस्यताको सिफारिस एकलौटी ढंगले गरेको र महासंघलाई चौतारीमय बनाउन खोजेको आरोप लगाउँदै युनियन बाराले विरोध स्वरुप महासंघको कार्यालयमा तालाबन्दी गरेको जनाएको छ ।

महासंघको संगठन विभाग एवं सचिव जयनारायण यादवको संयोजकत्वमा गठित सदस्यता सिफारिस समितिलाई बेवास्ता गर्दै अध्यक्ष उपाध्यायले महासंघको विधान र कार्यनिर्देशिका विपरित नयाँ सदस्यताको सिफारिस गरेकोले तालाबन्दी गरिएको युनियनका सचिव सागर विश्वकर्माले बताए ।

महासंघ बाराका अध्यक्ष कमलकुमार उपाध्यायले प्रक्रिया नपुर्‍याई गैरपत्रकार समेत गरि २९ जनाको नाम सिफारिस गरेको भन्दै सचिव जयनारायण यादव पक्षले पनि ५८ जनाको नाम सिफारिस गरेर केन्द्रमा पठाएको छ ।

प्रक्रिया मिचेर गरिएको सिफारिस रद्द गर्न र पक्रिया पूरा गर्न दवाव दिने उद्देश्यले ५८ जनाको नाम सिफारिस गरिएकोमा केन्द्रले पक्रिया पुरा गर्न लगाउनुको साटो अध्यक्षले नै सिफारिस गरेकाहरुलाई सदस्यता दिने तयारी गरेको सचिव यादवले बताए ।