चितवन, पुस ६–

चितवनका प्रमुख जिल्ला अधिकारी (प्रजिअ) नारायणप्रसाद भट्टले जिल्लाका उद्योगहरुको सृुरक्षामा कुृनै कमी आउन नदिने प्रतिवद्धता व्यक्त गर्नुभएको छ ।
चितवन उद्योग संघले आज (बुधबार) भरतपुरमा गरेको स्वागत कार्यक्रममा बोल्दै प्रमुख जिल्ला अधिकारी भट्टले यस्तो बताउनुभएको हो । उहाँले चितवनमा फस्टाउँदै गएको उद्योगको सुरक्षाका लागि ढुक्क भएर बस्न आग्रह गर्नुभयो । उहाँले भन्नुभयो–“उद्योगी व्यवसायीहरुको मूख्य समस्या चन्दा आतंक हो, म यस्तो अवस्था आउनै दिन्न ।” प्रजिअ भट्टले जिल्लाका उद्योगीहरुसंग सहकार्य गर्दै अघि बढ्ने बताउनुभयो । उहाँले उद्योगी व्यवसायीहरुलाई आत्मनिर्भर तर्फ अघि बढ्नु पर्ने सुझाव दिनुभयो । प्रजिअ भट्टले आफूलाई स्वागत गरिएकोमा खुशी व्यक्त गर्दै स्वागत सम्मानले थप आफ्नो लागि चुनौती थपिएको बताउनुभयो । उहाँले उद्योगीहरुले नराम्रो कामहरु गरे कारवाहीका लागि पछि नहट्ने समेत बताउनुभयो ।

कार्यक्रममा बोल्दै जिल्ला प्रहरी कार्यालय चितवनका प्रहरी उपरीक्षक (एसपी) दीपक थापाले चितवनका उद्योगीहरुको हरेक समस्यामा साथ दिने प्रतिवद्धता जनाउनुभयो । उहाँले राम्रो कामको सदैव साथ र सहयोग गर्ने भन्दै सहकार्य गर्दै अघि बढ्ने बताउनुभयो । उहाँले जिल्लाको शान्ति सुरक्षा कायम गर्नका लागि पनि उद्योगी व्यवसायीहरुको साथ र सहयोगको आवश्यकता रहेको बताउनुभयो । कार्यक्रममा जिल्ला अनुसन्धानका उपनिर्देशक अच्युत पन्त, सहकारी डिभिजन कार्यालय भरतपुरका प्राचार्य रेवतीरमण पोखरेलले समेत मन्तव्य व्यक्त गर्नुभएको थियो । कार्यक्रममा चारै जना प्रमुखहरुलाई संघका अध्यक्ष भीमबहादुर पाण्डेले मायाको चिनो र पुष्पगुच्छाले स्वागत गर्नुभएको थियो ।

कार्यक्रममा संघका निवर्तमान अध्यक्ष एवंम नेपाल उद्योग परिसंघका उपाध्यक्ष कृष्णप्रसाद अधिकारीले चितवन उद्योग संघले निर्माण गर्न लागेको औद्योगिक प्रदर्शनी केन्द्र र समग्र चितवनका औद्योगिक क्षेत्र र उद्योगीहरुको बारेमा प्रकाश पार्नुभएको थियो । कार्यक्रममा संघका वरिष्ठ उपाध्यक्ष भेषराज दुवाडीले स्वागत मन्तव्य व्यक्त गर्नुभएको थियो । कार्यक्रम संघका अध्यक्ष भीमबहादुर पाण्डेको अध्यक्षतामा सम्पन्न भएको थियो ।