जनजाति महासंघको बन्द सत्र साँझदेखि सुरु
चितवन, पुस ३–
चितवनमा शनिबारदेखि सुरु भएको नेपाल आदिवासी जनजाति महासंघको नवौं राष्ट्रिय महाधिवेशन अन्तरगत आज साँझदेखि बन्द सत्र सुरु भएको छ ।
नारायणगढस्थित नारायणी कलामन्दिरमा सुरु भएको बन्द सत्रमा तीन वर्ष अवधिमा गएिका क्रियाकलापको समिक्षा र भावी एजेण्डाको विषयमा वृहत छलफल भईरहेको केन्द्रीय अध्यक्ष नगेन्द्र कुमालले जानकारी दिनुभयो । विहानदेखि बन्द सत्र सुरु गर्ने भनिएपछि केही जातिय संगठनको प्रतिनिधिको विषयमा विवाद भएपछि साँझबाट मात्र बन्द सत्र सुरु भएको हो ।
महाधिवेशनमा २२ वटा विदेश शाखा, ७१ वटा जिल्ला समन्वय परिषद र ६५ वटा महासंघमा आवद्ध जातिय संस्थाबाट ४ सय २२ जना प्रतिनिधि, पर्यवेक्षकहरु सहभागी भएको जनजाति महासंघका महासचिव पेम्वा भोटेले जानकारी दिनुभयो ।
यो पटकको महाधिवेशनले महासंघको विधान संशोधन सँगै तीनवर्षे कार्यकालका लागि नयाँ नेतृत्व चयन गर्ने छ । यसअघिको विधानमा १३ सदस्यीय सचिवालय सदस्य रहने व्यवस्था थियो । त्यसलाई संशोधन गरेर संघीयताकै खाकामा १९ सदस्यीय बनाउने तयारी भएको महासंघले जनाएको छ । पौष २ गतेदेखि पौष ४ गते सम्म चितवनमा महाधिवेशन चल्नेछ । महाधिवेशनमा महासंघको विद्यान संशोधन सँगै महासंघको भावि योजना र जनजाति आन्दोलनका उपलव्धीको विषयमा समेत छलफल हुने छ । छलफलबाट निस्कीएको निश्कर्षपछि चितवन घोषणा पत्र जारी गर्दै महाधिवेशन सकिनेछ । र तीनवर्षे कार्यकालका लागि नयाँ कार्यसमिति चयन गर्नेछ ।
