चितवन,माघ २६-

नारायणगढ बजारका विभिन्न सडकका ढलहरु फुटेका छन् । महिनौदेखि फुटेका ढलहरु निर्माण हुन सकेको छैन । फुटेका ढलहरुबाट फोहोर सडकमा निस्कदा दुर्गन्धित फैलिएको छ ।

विशेषगरी शहीदचोकबाट बेलचोक जाने बाटो संगम मार्गमा ढलहरु फुटेका छन् । ढलको पानी सडकभरि बगेको छ । ‘ढलहरु फुटेको महिनौँ भइसकेको छ, तर मर्मत हुन सकेको छैन’ संगम मार्गका व्यवसायी दयाराम ढकालले भने, ‘फोहोर सडकभरि फैलिएर दुर्गन्धित फैलिएको छ ।’

शहीदचोकदेखि बेलचोक जाने सडक अति व्यस्त हुने गर्छ । यो सडक पश्चिम चितवनतर्फ जाने मुख्य सडक हो । अति व्यस्त हुने यस सडकको ढल फुटेर दुर्गन्धित फैलिँदा व्यवसायीहरु हैरानी भएका छन् । ‘यो सडकको ढल फुटेर दुर्गन्ध फैलेको छ । बसिनसक्नु भएको छ । तर, पनि सम्बन्धित निकायले ध्यान दिएको छैन’ व्यवसायी भगवती सापकोटाले भनिन् ।

व्यस्त सडकमा यसरी ढल फुटेपछि बटुवादेखि सवारी चालक सबैले सास्ती पाएका छन् । फुटेका ढलहरुलाई एकै ठाउँमा जम्मा गरेर राखिएको छ । तर, पनि सम्बन्धित निकायले चासो दिएको छैन । ‘यो ढल राखेको धेरै वर्ष भयो, अहिलेसम्म न मर्मत भएको छ, न त नयाँ फेरिएको छ । भत्केर बिजोग भइसक्यो तर कसैले पनि मर्मत राखेको छैन यहाँ’ एक व्यवसायीले भने ।

संगममार्गमा मात्र होइन, नारायणगढका भित्री सडकका ढलहरु धेरै ठाउँमा फुटेका छन् । ठाउँठाउँमा फुटेका ढलहरु समयमै मर्मत हुन नसकिरहेको अवस्थामा भरतपुर उपमहानगरपालिका भने उपभोक्ता तात्नुपर्ने बताउँछ ।

भरतपुर उमहानगरपालिकाका वातावरण शाखा प्रमुख विराट घिमिरेले नारायणगढ संगममार्गमा ढलहरु फुटेर काम नलाग्ने भएको बताए । ‘यहाँका ढलहरु फुटेर काम नलाग्ने भएका छन् । मर्मत गरेर हुँदैन नयाँ बनाउनुपर्छ’ वातावरण शाखा प्रमुख घिमिरेले भने, ‘यसको लागि स्थानीय उपभोक्ताहरु पनि तात्नुपर्छ ।’चितवनपोष्ट दैनिकवाट साभार