बैशाख २३, काठमाडौं – माप्य दुधकोशी गाउँपालिका सोलुखुम्बुले काठमाडौंमा रहेका आफ्ना नागरिकलाई मंगलबार राहत वितरण गरेको छ ।

गाउँपालिकाको उद्धारकार्यपछि  काठमाडौंमै बाँकि रहेका विद्यार्थी, ज्यालामजदूरी तथा आर्थिक रूपमा विपन्न परिवारलाई अतिआवश्यक खाद्य सामग्री चामल, दाल, तेल, नून वितरण गरेको वडा नम्बर १ का अध्यक्ष  अगमकुमार राईले जानकारी दिएका छन् । वडा अध्यक्ष राईका अनुसार प्रतिपरिवार २५ केजी चामल, दाल दुई केजी, तेल एक लिटर र नून एक केजी वितरण गरिएको थियो । कोरोना भाइरसको प्रकोप फैलिन नदिन सरकारले लकडाउन लगाएपछि काठमाडौंमा रहेका माप्य दुधकोशीका जनतालाई केही दिन अघि गाउँपालिकाले उद्धार गरेर गाउँ लगेको थियो भने केही काठमाडौंमै रहेकालाई राहत बाडिएको हो ।

वडा नम्बर एकका अध्यक्ष अगमकुमार राई तथा नेकपा जिल्ला कमिटी सोलुखुम्बुका सचिव गोम्बु शेर्पा ‘कर्ज्याङ’ को नेतृत्वमा काठमाडौंका विभिन्न ठाउँमा रहेका दुई सय घर परिवारलाई राहत वितरण गरिएको हो । कपन फैका, तिनचुली, छहारी क्लब जोरपाटी, तामाङ गुम्बा, लाहुरे टोल, हाती गौडा, भङ्गाल, भ्यालिपब्लिक स्कुल र धापासीमा रहेका परिवारलाई राहत बाडिएको थियोे । छुटेका बाँकी परिवारलाई भोलि पनि वितरण गरिने जनाइएको छ ।

राहत वितरणका लागि ‘पो:कम बङ्गुर फार्म’ का सन्चालक  अम्बरबहादुर राईले निशुल्क गाडी उपलब्ध गराएका थिए ।